28 красавіка ў Лукскай  школе,  як і ва ўсім Кобрынскім раёне,  праходзіла акцыя  “Чытаем разам Купалу і Коласа”, прысвечаная 135-годдзю з дня іх нараджэння. На трэцім уроку ўсе настаўнікі-прадметнікі і настаўнікі пачатковых класаў на працягу 5-10 хвілін удзялілі ўвагу вялікім  беларускім  класікам—Я. Купалу і Я. Коласу, а  урок беларускай мовы ў першым класе быў пабудаваны на матэрыяле гэтых вядомых пісьменнікаў.

У гэты ж дзень вучні, педагогі і госці школы мелі магчымасць паўдзельнічаць ў Вялікай беларускай дыктоўцы  “Разам з народам” пра  Я.Купалу па тэксце А. Мікуліч , у ходзе якой змаглі праверыць сваю граматнасць па беларускай мове. У час праверкі дыктовак тэкст дэманстраваўся па тэлевізары, што спрыяла  лепшаму  ўспрыманню і псіхалагічнаму камфорту  ў працы.

Перад Вялікай беларускай  дыктоўкай яе ўдзельнікі мелі мажлівасць паслухаць верш Я.Коласа “Вясной” у выкананні Н. Корац  і ўбачыць інсцэніроўкі вершаў гэтага ж паэта “ У школку” і “Першы заработак. Дома”  у  выкананні вучняў 5 класа.

Удзельнікі, якія справіліся з дыктоўкай на выдатна, атрымалі прызы, а вучні яшчэ і адпаведныя адзнакі па мове.

А вучаніца 11 класа Ліс Яўгенія з нагоды юбілеяў пісьменнікаў падзялілася з прысутнымі сваім эсэ “Тытаны беларускай літаратуры”, прысвечаным вялікім класікам.

Падрыхтавана: Вайцюк В.П.